సిడ్నీలో పాటల చిత్రీకరణ జరుపుకుంటున్న "ఆరెంజ్"

రామ్‌చరణ్ - భాస్కర్ కాంబినేషన్‌లో రూపొందుతోన్న లవ్ అండ్ ఎంటర్‌టైన్మెంట్ చిత్రం ఆరెంజ్(లవ్ ఇన్ ఫాల్). కె. వెంకట్రావు సమర్పణలో ప్రతిష్టాత్మక అంజనా ప్రొడక్షన్స్ బ్యానర్‌పై మెగా ప్రొడ్యూసర్ కె. నాగబాబు ఈ చిత్రాన్ని నిర్మిస్తున్నారు. "ఆరెంజ్"లో రామ్‌చరణ్ సరసన జెనీలియా, షాజన్ పదంశీ హీరోయిన్లుగా నటిస్తున్న సంగతి తెలిసిందే. 

ఈ చిత్రం ఇటీవలే హైదరాబాద్ షెడ్యూల్ పూర్తి చేసుకుంది. ప్రస్తుతం రెండు పాటల చిత్రీకరణ కోసం ఆస్ట్రేలియా బయలుదేరి వెళ్లింది చిత్ర యూనిట్. ఈ రోజు నుంచి అక్టోబర్ 30 వరకూ ఆస్ట్రేలియాలోని సిడ్నీలో కొరియోగ్రాఫర్ శోభి నృత్య దర్శకత్వంలో రెండు పాటలను చిత్రీకరణ చేయనున్నారు.

హారిస్ జైరాజ్ సంగీతం అందించిన ఆరెంజ్ పాటలు దసరా తర్వాత ఆదిత్య మ్యూజిక్ ద్వారా విడుదల చేసి, అలాగే చిత్రాన్ని నవంబర్ రెండో వారంలో ప్రేక్షకుల ముందుకు తీసుకురావడానికి సన్నాహాలు చేస్తున్నారు చిత్ర నిర్మాత నాగబాబు.

Posted in: