విద్యార్థులను తప్పుదోవ పట్టించారు : ఏపీపీఎస్సీ చైర్మన్ వెంకట్రామిరెడ్డి

రాజకీయ నాయకులు విద్యార్థులను తప్పుదోవ పట్టించారు. 42 శాతం వాటా కోసం గ్రూప్-1 ప్రిలిమ్స్ పరీక్షలను అడ్డుకోవాల్సిన పని లేదని ఏపీపీఎస్సీ చైర్మన్ డాక్టర్ వై వెంకట్రామిరెడ్డి చెప్పారు. సోమవారం కోటప్పకొండ శ్రీ త్రికోటేశ్వర స్వామిని దర్శించుకొని వెంకట్రామిరెడ్డి దంపతులు ప్రత్యేక పూజలు నిర్వహించారు.

ఈ సందర్భంగా ఆయన విలేఖరులతో మాట్లాడుతూ ప్రిలిమ్స్ పరీక్షల ఫలితాలను నెల రోజుల్లో విడుదల చేస్తామని తెలిపారు. మార్చిలో మెయిన్స్ పరీక్షలు నిర్వహిస్తామన్నారు. ఈలోగా 42 శాతం వాటా కోసం రెసిడెన్షియల్ ఆర్డర్ తెచ్చుకోవచ్చన్నారు. తనపై ఆరోపణలు చేసేవారిపై జవహార్ కమిటీ ఐదు పేజీల నివేదిక అందజేసిందని, దీనిలో వారి పురాణం బయట పడుతుందన్నారు.

త్రికోటేశ్వరుని సన్నిధిలో కుటుంబ సభ్యులపై ప్రమాణం చేసి చెపుతున్నానని, తాను ఎలాంటి అవినీతికి పాల్పడ లేదన్నారు. గ్రూపు-1 చరిత్రలోనే రికార్డు స్థాయిలో అభ్యర్థులు పరీక్షలకు హాజరయ్యారన్నారు. ఉస్మానియా విశ్వ విద్యాలయం బీఈడీ కళాశాలలో ఏర్పాటు చేసిన పరీక్షా కేంద్రంపై తగు నిర్ణయం తీసుకుంటామన్నారు.

విద్యార్థులకు అన్ని స్థాయిల్లో పరీక్షలు పూర్తయ్యే వరకు మార్కులు చూసే అవకాశం వుండదన్నారు. ఉస్మానియా విశ్వ విద్యాలయానికి చెందిన విద్యార్థులు మొన్నటి వరకు కార్పొరేట్ రంగంపై ఆసక్తి చూపారని, అక్కడ ఉద్యోగ అవకాశాలు దెబ్బతినటంతో ఇప్పుడు ప్రభుత్వ ఉద్యోగాలపై దృష్టి సారించారన్నారు.

అందరి కన్నా ఉస్మానియా విశ్వ విద్యాలయం విద్యార్థులు అత్యధిక ప్రతిభ చూపుతారన్నారు. వారు చెప్పే ప్రకారం 42 శాతం అంటే 80 ఉద్యోగాలు తెలంగాణ వారికి ఇవ్వాలని, 160 మంది అభ్యర్థులను ఇంటర్వ్యూలకు పిలవాల్సి వుంటుందని, కాని అంతకంటే ఎక్కువ మంది ఉస్మానియా విద్యార్థులు ఇంటర్వ్యూలకు ఎంపిక అవుతారన్నారు. దీనికి కారణం వారికి నగరంలో ప్రత్యేక వసతులు వుండటమేనని ఆయన వివరించారు.

Posted in: