రోశయ్య సర్కారు ఆ పని ఎందుకు చేయలేదు: గట్టు

మహబూబ్‌నగర్ పర్యటనకు వెళ్లిన తెలుగుదేశం పార్టీ అధినేత చంద్రబాబును అడ్డుకోబోయిన వారిపై లాఠీఛార్జీ ప్రయోగించి వెళ్లగొట్టిన రోశయ్య సర్కారు, కడప ఎంపీ జగన్మోహన రెడ్డి మహబూబ్‌నగర్ ఘటనలో ఎందుకు ఆ పని చేయలేకపోయిందని గట్టు రామచంద్రారావు ప్రశ్నించారు. దీనిని బట్టి జగన్ మహబూబ్‌నగర్ పర్యటనను ప్రభుత్వం ఉద్ధేశపూర్వకంగానే అడ్డుకుందని రామచంద్రారావు విమర్శించారు.

ఇందులో చంద్రబాబుకో నీతి.. జగన్‌కో రీతా అని గట్టు ప్రశ్నించారు. ప్రజాస్వామ్యంలో ఎవరైనా ఎక్కడైనా తిరిగే హక్కుందనే విషయాన్ని ప్రభుత్వం ఇప్పటికైనా గుర్తించాలన్నారు.

సున్నితమైన అంశమైనందున జగన్ వరంగల్ వెళ్లకపోయి ఉంటేనే బాగుండేదని చెప్పిన చంద్రబాబును నేడు అదే ప్రశ్న అడిగి ఉంటే ఏం సమాధానం చెబుతారని గట్టు ప్రశ్నించారు.

రైతుల ఎరువుల కోసం మహబూబ్‌నగర్ వెళ్లిన చంద్రబాబుకు తన హయాంలో విద్యుత్ బిల్లులు కట్టలేదనే సాకుతో రైతులపై పీడీ యాక్ట్ కింద కేసులు నమోదు చేసి ఆత్మహత్యలకు పురిగొల్పిన విషయం గుర్తుకురాకపోవడం విడ్డూరంగా ఉందని రామచంద్రారావు అన్నారు.

Posted in: