సర్కారును అస్థితరపరిచేందుకు కుట్ర: గోనే ప్రకాశ రావు

రాష్ట్రంలోని ముఖ్యమంత్రి కె.రోశయ్య సర్కారును అస్థిర పరిచేందుకు తెలంగాణ ప్రాంతానికి చెందిన కొంతమంది ఎంపీలు కుట్ర పన్నుతున్నారని ఆర్టీసీ మాజీ ఛైర్మన్ గోనె ప్రకాశరావు ఆరోపించారు. ఆయన సోమవారం హైదరాబాద్‌లో సీఎల్పీ కార్యాలయం మీడియా పాయింట్ వద్ద విలేకరులతో మాట్లాడుతూ ఉస్మానియా విశ్వవిద్యాలయ ప్రాంగణానికి కాంగ్రెస్ పార్టీకి చెందిన తెలంగాణ ఎంపీలు పోవడం వల్లే పరిస్థితి ఉద్రిక్తంగా మారిందన్నారు. 

అక్కడకు వెళ్లిన ఎంపీలు శాంతియుతంగా ప్రవర్తించకుండా విద్యార్థులతో కలిసి ఆందోళనకు దిగడం వల్లే పరిస్థితి ఉద్రిక్తంగా మారిందన్నారు. సజావుగా సాగుతున్న రోశయ్య సర్కారుకు అడ్డంకులు సృష్టించి అస్థిర పరిచాలనే ఏకైక ఉద్దేశ్యంతోనే వారు ఇలా నడుచుకున్నారన్నారు. ఈ విషయాన్ని అధిష్టానం దృష్టికి తీసుకెళ్ళనున్నట్టు ఆయన తెలిపారు. 

ఇకపోతే.. ఏపీపీఎస్సీ ఛైర్మన్‌‍ను పదవి నుంచి తొలగించే అధికారం ముఖ్యమంత్రికి ఉందన్నారు. అందువల్ల ఛైర్మన్ వెంకట్రామిరెడ్డిని తొలగించాలని తెలంగాణ ఎంపీలు డిమాండ్ చేసివుంటే బాగుండేదన్నారు. అంతేకానీ విద్యార్థుల భవిష్యత్‌తో ఆడుకోవడం భావ్యం కాదన్నారు. 

నెల్లూరులో దివంగత నేత వైఎస్ విగ్రహ ప్రతిష్టను మంత్రి ఆనం రామనారాయణ రెడ్డి సోదరులు అడ్డుకోవడం బాధాకరమన్నారు. ముఖ్యమంత్రి రోశయ్య మెప్పు పొందేందుకే వారు ఇలా వ్యవహరిస్తున్నారని గోనె ప్రకాష్ రావు ఆరోపించారు.

Posted in: