తెలంగాణా రాదు.. అందుకే 42 శాతం వాటా పోరు..!!

జస్టిస్ శ్రీకృష్ణ కమిటీ ఓ దిక్కుమాలిన కమిటీ, పనికిమాలిన కమిటీ అనీ ఆ కమిటీ ఏర్పడిన నాటి నుంచి తెలంగాణా రాష్ట్ర సమితి చీఫ్ కేసీఆర్ అంటూనే ఉన్నారు. డిసెంబరు 31 తర్వాత తెలంగాణాలో భూకంపం వస్తుందనీ చెపుతున్నారు. అంటే శ్రీకృష్ణ కమిటీ తెలంగాణాకు వ్యతిరేకంగా నివేదిక ఇస్తుందని అనుకోవాలా..? అనుకోవాలన్నట్లుగానే కేసీఆర్ వ్యాఖ్యలు ఉంటున్నాయి.

కేసీఆర్ వ్యాఖ్యల వల్లనైతేనేమీ.. మరి దేనివల్లనైతేనేమి.. ఇపుడు తెలంగాణా ప్రాంతంలో తమకు దక్కాల్సిన వాటాకోసం పోరాటాలు మొదలయ్యాయి. తొలుత గ్రూప్-1తో ప్రారంభమైన ఈ పోరు ప్రస్తుతం న్యాయాధికారుల నియామకాల్లో వాటా కోరేంత వరకూ వచ్చింది.

మరో మూడు నెలల్లో శ్రీకృష్ణ కమిటీ నివేదిక ఇవ్వనున్న తరుణంలో వాటాకోసం కీచులాట ఎందుకో..? అని తరచి చూస్తే.. రెండు అంశాలు బోధపడతాయి. అందులో ఒకటి.. కేసీఆర్ అన్నట్లు కమిటీ నివేదిక పనికిమాలింది... అంటే ఆయన ఉద్దేశ్యం కమిటీ తెలంగాణాకు మద్దతు ఇవ్వదన్నదే. కనుక మన వాటా మనం దక్కించుకుందామన్న పట్టుదలతో తెలంగాణా ప్రజలు ఉన్నారని చెప్పుకోవచ్చు.

మరొక నిగూఢమైన అంశం ఏమిటంటే.. 42 శాతం వాటా అడిగితే.. ప్రభుత్వం ఇవ్వదు.. కనుక రేపు... అంటే డిసెంబరు నాటికి వీటన్నిటినీ సాకుగా చూపించే యత్నంలో భాగంగా ఈ వాటా పోరు అంటున్నారు కొంతమంది. వ్యూహాత్మకంగా వరుసగా తెలంగాణా ప్రాంతంలోని కొంతమంది నాయకులు వివిధ సంస్థలు, వర్గాలను వాటాకోసం పోరు చేయాలని చెపుతున్నట్లు విశ్వసనీయ సమాచారం.

ఎలాగూ రాష్ట్రం వాటాలను ఇప్పటికిప్పుడు తేల్చలేదు కనుక.. వచ్చే డిసెంబరు నాటికి వీటన్నిటినీ అస్త్రాలుగా చేసుకుని సీమాంధ్ర నాయకుల మెడలు వంచి తెలంగాణా రాష్ట్రాన్ని సాధించవచ్చనేది యోచన. మరి ఈ ఫార్ములా సక్సెస్ అవుతుందో లేదంటే ఫెయిల్ అవుతుందో చూడాలి.

Posted in: