దేశంలో ఏ శక్తితోనైనా పోరాడుతా: అధిష్టానానికి జగన్ సవాల్

వైఎస్ జగన్ మోహన్ రెడ్డి తన స్వరానికి మరింత పదును పెంచుతున్నారు. నేరుగా అధిష్టానంపై బాణాలు వదిలేందుకు సిద్ధపడుతున్నారు. ప్రకాశం జిల్లాలో తలపెట్టిన ఓదార్పులో జగన్ సంచలన వ్యాఖ్యలే ఇందుకు నిదర్శనంగా చెప్పుకోవచ్చు.

ఓదార్పు యాత్రలో భాగంగా జగన్ మాట్లాడుతూ.. తన తండ్రి వైఎస్సార్ ఆశీస్సులు, ప్రజల బలం తనకు ఉన్నంతవరకూ ఎవరూ తనను ఒంటరివాడిని చేయలేవన్నారు. అంతటితో ఊరుకోకుండా ఈ బలంతోనే దేశంలో ఎంతటి శక్తినైనా ఎదుర్కొని పోరాడుతానని అన్నారు.

అయినా 36 ఏళ్ల తనను ఢీకొనేందుకు అన్ని శక్తులు ఏకమవడం అవసరమా..? అంటూ ప్రశ్నించారు. తన తండ్రి మరణవార్త విని తట్టుకోలేక మృతి చెందిన వ్యక్తుల కుటుంబాలను పరామర్శించడం తప్పా..? అని ప్రశ్నించారు. రాజకీయాలు గురించి మాట్లాడితే తప్పంటారు.. మాట్లాడకపోతే మాట్లాడలేదంటారని అన్నారు.

గత పది నెలలుగా తనపై ఏమేమి జరుగుతున్నాయో ప్రజలకు తెలుసని అన్నారు. చంద్రబాబు, రామోజీరావు వంటి వారు తనపై ఎన్ని ఎత్తులు వేసినా ఏమీ చేయలేరని అన్నారు.

Posted in: