తెరాస తొత్తులుగా తెలంగాణ కాంగ్రెస్ ఎంపీలు: అనంత

తెలంగాణ రాష్ట్ర సమితి అధినేత కె.చంద్రశేఖర్ రావు తొత్తులుగా కాంగ్రెస్ పార్టీకి చెందిన తెలంగాణ ప్రాంత ఎంపీలు వ్యవహరిస్తున్నారని అనంతపురం ఎంపీ అనంత వెంకట్రామిరెడ్డి ఆరోపించారు. పార్టీ అధినేత్రి సోనియా గాంధీ బ్రిగేడ్ అంటూనే కేసీఆర్‌తో కుమ్మక్కవుతున్నారని ఆయన ధ్వజమెత్తారు.

గ్రూప్-1 పరీక్షల నిర్వహణ అంశంపై తెలంగాణ ప్రాంతానికి చెందిన ఎంపీలందరూ ప్రభుత్వాన్ని తీవ్రంగా విమర్శలు గుప్పించిన విషయం తెల్సిందే. వీరిపై సీమాంధ్ర ప్రాంతానికి చెందిన ఎంపీలు, ప్రజాప్రతినిధులు తప్పుబట్టారు.

ఈ అంశంపై ఎంపీ అనంత వెంకట్రామిరెడ్డి మీడియాతో మాట్లాడుతూ సోనియా బ్రిగేడ్ అంటూనే కేసీఆర్ గుమ్మం వద్ద తమ పార్టీ ఎంపీలు కావలి కాస్తున్నారన్నారు. పేరుకు కాంగ్రెస్ పార్టీలో కొనసాగుతూ లోపల మాత్రం కేసీఆర్‌తో రహస్య అవగాహన కుదుర్చుకున్నారని ఆరోపించారు.

ఈ అంశంపై పార్టీ అధినేత్రి సోనియా గాంధీకి ఫిర్యాదు చేయనున్నట్టు ఆయన ప్రకటించారు. గ్రూప్-1 పరీక్షల నిర్వహణలో ప్రభుత్వం అనుసరించిన కఠిన వైఖరిని ఎంపీ అనంత సమర్థించారు. ముఖ్యమంత్రి రోశయ్య ప్రతి విషయంలోనూ ఇదే విధంగా వ్యవహరించాలని ఆయన విజ్ఞప్తి చేశారు.

Posted in: