వసూళ్ళ కోసమే తెరాస ఆవిర్భవించింది: టీజీ.వెంకటేష్

తెలంగాణ రాష్ట్ర సమితి డబ్బు వసూళ్ళ కోసమే ఆవిర్భవించిందని రాయలసీమ హక్కుల వేదిక కన్వీనర్ టి.జి.వెంకటేష్ ఆరోపించారు. అవుటర్‌ రింగ్‌ రోడ్డు నిర్మాణంలో కోల్పోయిన భూమికి పరిహారంగా టి.జి.వెంకటేష్‌ విలువైన భూమి పొందారని తెరాస ఎమ్మెల్యే హరీష్‌ రావు చేసిన వ్యాఖ్యలపై టీజీ ఆదివారం స్పందించారు. 

దీనిపై ఆయన హైదరాబాద్‌లో మీడియాతో మాట్లాడుతూ ఓటర్ రింగ్ రోడ్డు నిర్మాణం కోసం ప్రభుత్వం తన భూమిని స్వాధీనం చేసుకుందన్నారు. ఇలా భూములను స్వాధీనం చేసుకున్న వారందరికీ ఒకచోట తనకు మరోచోట ప్రభుత్వం భూమిని కేటాయించారని గుర్తు చేశారు. 

అయితే, కొందరితో తెరాస నేత హరీష్ రావు మ్యాచ్ ఫిక్సింగ్‌కు పాల్పడి తనపై ఆరోపణలు చేస్తున్నారని ఆయన దుయ్యబట్టారు. తెరాస భవనం ఉన్న భూమి న్యాయమైనదో, తన భూమి న్యాయమైనదో తేల్చుకోవడానికి రావాలని ఆయన సవాల్‌ విసిరారు. ఆ భూమి విషయంలో ఏ విచారణకైనా తాను సిద్ధమేనని ఆయన ప్రకటించారు. అలాగే, తెలంగాణ రాష్ట్ర సమితి పుట్టిందే డబ్బు వసూళ్ళ కోసమని వెంకటేష్ ఆరోపించారు.

Posted in: