టాలీవుడ్ "కింగ్" నాగార్జున లాంటి యంగ్ అండ్ డైనమిక్, ఎనర్జిటిక్ స్టార్ ఇంకెవ్వరూ లేరని అందాల తార, అతిలోక సుందరి శ్రీదేవి అన్నారు. నాగార్జునతో టాలీవుడ్‌లో నటించడం ఎంతో సంతోషంగా ఉందని ఆమె వెల్లడించారు. చాలాకాలం తర్వాత తెలుగు వారందరినీ కలుసుకునే అవకాశం వచ్చిందన్నారు. 

నాగ్ చాలా హార్డ్‌వర్కర్, అతనిలా కో-ఆపరేట్ చేసే యాక్టర్ మరొకరు లేరని కితాబిచ్చింది. సినీ ప్రపంచంలో తాను ఈ స్థాయికి ఎదగడానికి దర్శకులు, ప్రత్యేకంగా రాఘవేంద్రరావు, నిర్మాతలు, ప్రేక్షకులు, అభిమానుల ఆదరణే ప్రధాన కారణమని చెప్పారు. సినీ ప్రపంచంలో తాను గొప్ప స్థాయికి ఎదగడానికి సహకరించిన ప్రతి ఒక్కరికి తాను రుణపడి ఉన్నానన్నారు.

ప్రముఖ దర్శకుడు రామ్ గోపాల్ వర్మ దర్శకత్వంలో సునీల్ హీరోగా రూపుదిద్దుకోనున్న కొత్త చిత్రం "కథ, స్క్రీన్ ప్లే, దర్శకత్వం అప్పల్రావు"కు క్లాప్ కొట్టేందుకు శ్రీదేవి, బోనీకపూర్ దంపతులు హైదరాబాద్‌కు వచ్చారు. అన్నపూర్ణ స్టూడియోలో సునీల్-రామ్‌గోపాల్ వర్మ కొత్త సినిమా శుక్రవారం ఆరంభమైంది. ప్రముఖ హాస్యనటుడు, హీరో సునీల్‌పై తీసిన ముహూర్తపు షాట్‌కు అతిలోక సుందరి శ్రీదేవి, కింగ్ నాగార్జున క్లాప్ కొట్టి ఆరంభించారు. 

ఈ కార్యక్రమంలో పాల్గొన్న నాగార్జున మాట్లాడుతూ.. శ్రీదేవితో ఆఖరి పోరాటం నటించే సమయంలో చాలా జడుసుకున్నానన్నారు. మిస్ ఇండియాతో నటించడమంటే కాస్త భయమేసిందని, కానీ దర్శకేంద్రుడు కె.రాఘవేంద్రరావు, శ్రీదేవి సహకారంతో ఆ చిత్రంలో నటించానని నాగ్ చెప్పారు. అలాగే రామ్ గోపాల్ వర్మతో కొత్త చిత్రం చేసేందుకు తాను సిద్ధంగా ఉన్నానని కింగ్ అన్నారు. "రామ్ నీతో సినిమా చేసేందుకు నేను రెడీ. ఎంత టైమ్ అయినా ఫర్లేదు. నేనెప్పుడూ యంగ్‌గా ఉంటానని" చలోక్తి విసిరారు.

ఇంకా ఈ కార్యక్రమంలో దర్శకేంద్రుడు కె. రాఘవేంద్రరావు, నాగార్జున, రానా, నాగచైతన్య, నితిన్, సుమంత్, కలర్స్ స్వాతి తదితరులు హాజరయ్యారు.

Posted in: